Kaupapa: Rugby League

I haukerekere te kapa Kiwi i a Ahitereiria i te tukinga Anzac

Wikitōria Day
  • Ahitereiria

I haukerekere te kapa Kiwi i a Ahitereiria i te tukinga Anzac ki te Taiwhanga o Suncorp i mua i te toru tekau mā rua mano tāngata neke atu. 

Kāre anō a Aotearoa kia whakahinga i a rātou mai anō i te tau kotahi mano, iwa rau iwa tekau mā waru.

I whakatārewahia te kēmu nei mō te rua rā nā te ua tāngutungutu i te Pōmere, heoi, ahakoa tēnā he hua nui tonu i puta.

Inā te pai o tā Ahitereiria tīmatanga, ā, i moata rawa tā rātau whakatata atu ki te rārangi. Heoi, nā Sam Thaiday ngā piro mā ngā Kangarū i whakakao mai.

Kāre tētahi mea i pāpare i te toki o te kēmu, i a Manu Vatuvai. Nāna te piro tuatahi ki te kokonga. Nā konā ka orite ngā tatauranga. He ono ki te ono.

I kitea ngā mahi ā-kapa. I autaia te whana a Johnson, ā, ka tau ki roto i ngā ringa o Peta Hiku, kātahi ka whiua ki a Manu Vatuvai kia riro mai i a ia tana pironga tuarua. 

He toru mita i mua i te rārangi, ka hiakai te kapa Kiwi ki te whiwhi piro. Nā wai, ka waimarie a Shaun Johnson, kōtata ki ngā pou.

Tērā pea ko te pironga hiamo rawa o te kēmu, ko tērā i tīmata i te rārangi haurua. I tere tā Shaun Kenny-Dowell whai i te pōro, ā, ka whai hua ia i ngā ringa makere o Greg Inglis.

Te āhua nei i whiwhi a Josh Dugan i tēnei piro, engari, e ai ki ngā tāruatanga, i waho kē tōna waewae i mua i tana whakatau i te pōro.

I tae ki te wā e hana mai ai a Ahitereiria. Kātahi tonu a Will Chambers ka hipa i te rārangi.

Kotahi miniti e toe ana, ka whana a Shaun Johnson i te pōro ki te pokapū o te whīra. Te hanga nei kua waimarie anō a Kenny-Dowell, engari kāre i whakaaetia.

E tika ana kia whakanuia e te kapa Kiwi tā rātau toanga, rua tekau mā ono ki te tekau mā rua.