I eke a Ahitereiria ki taumata kē i te whakataetae Ipu Whutupōro o te ao

Tamati Tiananga
  • Ahitereiria

Ki te whakataetae Ipu Whutupōro o te ao, o ngā kapa e whitu i eke ki ngā whiringa toa, kotahi anake te tira i kapo ake i te mētara koura.

I hinga i a Aotearoa a Ahitereira, e ono ki te rima ngā tatau, kia toitū ai i te wāhanga ki te reanga Tāne Toru Tekau Mā Rima Tau te pakeke.

I eke te kapa o Aotearoa i te reanga tāne toru tekau ma rima tau, hei taitara tuatahi mā te motu ki te Ipu o te Ao.

E ai ki a Heston Potaka, “Te haukawe kei roto i taku ngākau, te hokinga aku mahara ki ngā kaiako o mua ki ōku whānau e noho ana ki te kainga.”

Mai i te tau kotahi mano waru rau waru tekau mā waru, ko Ahitereria te toa, ko Aotearoa kei muri e tuarua ana.

Hei tā Heston Potaka, “Kei te waipuke kē te aria kei roto i taku ngākau i tēnei wā, he mīharo katoa ka eke mātou ki te tini o te maunga, ki a manono, ki au he mīharo kē.”

I te wāhanga tāne, i miere i a Aotearoa a Ahitereria, tekau mā tahi ki te rua, hei taumata mō ngā wehenga tarauranga katoa o te whakataetae.

Ki tā Mita Graham, “He maha tonu ngā akoranga, kaore anō ki a tau ki roto i au te hinga, engari kaore e kore e mamae ana te ngākau i tēnei wā, e mamae ana te tīma katoa.”

E ai ki te kaiurungi o te kapa ki a Mita Graham, ko Ahitereiria tonu te kapa a runga i taua rā.

E ai ki a Graham, “Mōku ake me ki te kāpene tū whakahihi tonu au i runga anō i ngā marama kua whakapae e taku tīma ki te whakangungu mō tēnei, kātahi ka tae mai ki konei, nōreira ahakoa te hinga o tēnei kemu me ki koira tōku whānau, ngā tuakana me ngā teina ka mihi ki a rātou mō ngā mahi whakangungu tae noa ki tēnei pō ahakoa kaore mātou ki a eke.”

Ki te kapa wahine, i te rikarika ngā wairua o Aotearoa nā tā rātou turaki i Ahitereria i ngā whiringa whānui, te rarunga tuatahi ia mā Ahiteiria i ngā tukinga whitu tekau mā toru o te whakataetae.

Engari nō te ekenga ki te whiringa toa ka hinga a Aotearoa, waru ki te whā. Ā, i te rangi nei i te waihape kē mai ngā kapa o Aotearoa ki te kāinga