Kaupapa: Touch Rugby

I angitū a Te Rarawa i te wāhanga tāne matua o te Whakataetae Pā Whutupōro Māori

Lynette Amoroa

Hei whakatoatoa m`a Te Rarawa, ko tana toa i te taitara i te wāhanga tāne matua o te Whakataetae Pā Whutupōro Māori.

I raru i a rātou te kapa o Wairere, whai muri i ngā tau maha e mutu mai ana ki ngā pae o runga, hēoi i tēnei tau ko te kapo i te wikitōria mō te wā tuatahi te whainga. 

Whakaaweawe ana a Te Rarawa i te wehenga tuatahi kia whai painga i ngā hopunga pōro katoa. Ehara a Wairere i te tauhou ki te hākinakina nei, engari i uaua mā rātou te wāwāhi i te rārangi ārai, me te whakamutu i te mahere tākaro.

I kumea e Te Rarawa ngā hoariri ki waenganui kia tūwhera mai ai ngā āputa i waho. Engari i haututu a Wairere ki waenganui, kia hua mai ko tēnei piro ngāwari noa.

Nā tētahi waewae parahutihuti anō i whai piro ai a Te Rarawa. I tere puihi whakamuri a Wairere e Te Rarawa, ā nāwai rā ka kite mai te rārangi piro.

I te wehenga tuarua ka takaoraora a Wairere ki te whai piro, engari he mauritau ngā kaiwawao o Te Rarawa. Ka puta a maurirere ki waenga i te tira o Wairere, nā tērā ka rere te pōro ki roto tonu i ngā ringaringa o Te Rarawa kia iri ai ngā tatau e ono ki te toru.