Hei ā kōkō ake nei hoki mai Campbell ki te hāpai i ngā rangatahi Māori

James Perry

Ko te awhero nui ka whakaawe a Ngāi Māori i tā Tiger Woods wikitōria i te whakataetae Tour Championship i Āmerika.

Nō tōna wikitōria tuatahi i ngā tau e rima, kua hoki anō te ingoa o Tiger Woods ki te poti o te waha. I angitu ai te ika a-Whiro i te whakataetae Tour Championship i East Lake, Georgia, Āmerika mā ngā te rua hahaunga, ko Billy Horschel i oti tuarua mai. Koinei te wikitōria 80 mō Woods, e rua noa iho i muri i a Sam Snead.

Hei tā Bernie O'Donnell, mema o te poari o NZ Māori Golf Association, he kōtuku rerenga tahi a Woods. "Mēnā ka kitea taua momo tangata e koe nōu te waimārie. Kōtahi anakē tai mai ai tētahi manu pērā io ā reanga, i ā reanga, pērā ki a Michael Jordan pērā hoki ki a Richie McCaw."

Neke atu i te rua tekau tau a Woods e whakaawe ana i ngā momo kaihahau pōro puta noa, hei tā O'Donnell anō, "tāne rānei, wahine rānei, ko tō rātou hiahia ki te mahi pērā kia Tiger Woods."

Kua tahuri a NZMGA ki te toki hahau pōro nō Ngāti Ruanui, nānā a Woods i hinga i tētahi whakataetae kaitā ki te whakawhanake i ngā kaihahau pōro rangatahi Māori. Ko Michael Campbell tērā, i riro i ā ia te US Open i te tau 2005, he rua hahaunga te āputa ki a Woods, i tuarua mai.

Hei te timatanga o te tau e tū mai nei, hoki mai ai a Campbell ki Aotearoa mō tētahi hōpuni whakangungu, kōtahi wiki te roa i mua i ngā whakataetae ā motu Māori ka tū ki Taupō. Hei tā O'Donnell, "nō mātou te waimārie i tōna hokinga mai."

Me he kōtuku rerenga tahi a Woods o tēnei reanga, mā te ringa hāpai o te Māori nāna i hinga, taihoa ka kite i tētahi kōtuku Māori anō e tau ana ki te tihi o te ao hahau pōro ā ngā tau e heke nei.

Ka tū ngā whakataetae ā motu Māori ki Taupō mai i te 6 ki te 11 o Kohi Tātea.