He wikitōriatanga karapīpiti tuarima mā Tāmaki

Rahia Timutimu
  • Waikato/Te Waiariki

Ko Tāmaki Makaurau tonu i te kikorangi te kapa makau mai i te timatanga.

Kua wikitōria rātou i tēnei taitara i ngā tau e whā kua hipa.

Kāhore i roa, ka whakawhiti a Tyme Nikau i te rārangi piro mō Tāmaki i te pironga tuatahi o te tukinga.

Tekau mēneti whai muri iho, i ea anō i a Tāmaki ngā pironga e whā, me te whakaatu atu ahakoa te marangai, i māmā noa te turuki i ngā piro.

Ā, kāore i mutu i kona, i tere huaki i ngā kaiwhakangungu o te taitara te rārangi ārai, kia whai piro ai a Tane Rapira i mua i te wehenga rua.

Rua tekau mā waru ki te kore ngā tatau ki a Tāmaki.

I te haurua tuarua ko te āhua nei, kotahi noaiho te kapa e whai piro ana, ko Tāmaki anō tērā i eke i te rārangi piro i te wehenga tuarua.

Heoi i ūpoko māro a Te Māhurehure, ka eke e Brad Clarke i te paehau matau.

A, i tōai anō i a rātou e rua ngā wā, i te tekau mēneti ki te mutunga.

Heoi i a Tāmaki te kōrero whakamutunga, me te whai piro i raro tonu i ngā pou, kia wikitōria i te taitara Rohe mo te wā karapīpiti e rima, toru tekau mā waru ki te tekau mā whā ngā kaute whakamutunga.

Hei tā Tama-te-Rerewa Koopu o Tāmaki, “Ia kēmu ia kēmu ko mātou tērā e hoki mai ana, ahakoa ko wai, ahakoa nō hea.

He pakari nei tō mātou pakanga ki ngā tīma katoa.”