He whawhai whakahirahira ma Cameron

Tamati Tiananga

Ko te wā tonu te hoariri mā Shane Cameron i a ia e whai ana i tētahi taitara ā-Ao, hēoi mā te turaki i a Brian Minto ka koke ia ki tāna e manako nui nei, kia eke ki te koekoenga o angitu. 

Kua whakawaiwai pau te kaha a Cameron. E rua pō noa e toe ana ka puta ia ki te mura o te ahi mekemeke me te aha, ko te tohu nui ko te wikitoria.

E ai ki ētahi mātanga mekemeke, kei tawhiti kē te pūkenga o Cameron i tō Minto. E rua marama a Cameron e whakaheke tōtā ana kia rite ai mō te pakanga e kainamu mai nei 

Ā, haunga rā te kotahi tau o Cameron e noho whawhai-kore ana, i te whakapau kaha tonu ia i te whare whakapakari. Hei tana e kore a ia e nakawhiti i te noho noa, engari kē mā te whakapakari tinana ia rā.