He whare whakapakari tinana kua whakapuaretia e tētahi uri o Ngāpuhi

  • Tāmaki Makaurau

He rua tekau tau noa te pakeke o Jesse Wynyard o Ngāpuhi, ā, e ahu whakamua ana tōna umanga i te ao nakawhiti. Kua huri rauna ia i te ao, hei kaiwhakangūngū nakawhiti ki runga i tētahi kaipuke kawe tūruhi nei, ā, kua whakahaerehia e ia tētahi kamupene pire hauora. Ināianei kua arotahi ia ki te whakatū i tōna ake whare whakapakari tinana.

Mārama te kitea tōna waweruka mō te nakawhiti, koia hoki te mahi a Jesse Wynyard inaianei.

Hei tā tēnei uri o Ngāpuhi, tā Jesse Wynyard “ko te take nui i uru atu ai ki tēnei tūmomo mahi nakawhiti i tupu mai i runga i te mea i te tino tūpuhi au i ngā wā o mua”

Ā, kua patua hoki ētahi atu whakapātari ō-mua, nōna i te tekau mā whitu tau te pakeke, i kaha ia ki te inu waipiro ki te kai i ngā whakapōauau engari whai muri i te tono atu ki tētahi akoranga nakawhiti i te tau rua mano tekau mā rua, kua huri tōna ao.

Hei taana anō, “Tērā anō taku waimarie kia whai mahi au i runga i tētahi o ngā kaipuke kawe tūruhi nui rawa atu o te ao, tūturu, ko aku mahi he kōrero tahi ki te iwi nui tonu, ā, kia korikori ngātahi me te maha noa atu o ngā tāngata. Kua huri ngā tai i roto i ngā marama e whā kua hipa”

E iwa ngā marama a Jesse e huri haere ana i te ao, e whakamīharo ana i ngā iwi o tarawāhi me tōna tū Māori nei.

“Kua kitea taku mita reo, taku tāmoko anō hoki e te tini tangata, ā, mīharo katoa ana rātou mō ngā āhua katoa o tēnei whenua” te whakapae a Jesse.

I tana hokinga mai ki te kainga i tērā tau, i whakahaere ia i tētahi kamupene pire hauora, ā, inaianei kei te whakatū ia i tana ake whare korikori tinana Snap Fitness ki Albany me tāna ake whārangi ipurangi hei whakangūngū i te iwi nui tonu.

Hei tāpiritanga atu, ko tā Jesse “he mahi i runga i te ipurangi mā te Skype, ā, ko te nuinga o aku mahi nakawhiti e whakahaerehia ana mā te ipurangi. Tūmeke katoa ana au i te nui o te mahi e taea ana”

Ā, ko te āhua nei he tauira pai te korokē nei ki āna kiritaki, arā, mā te whakapeto ngoi tūtuki ai ngā moemoea.