Kaupapa: Rugby

He wero tā te kāreti o Scots kia haria a Raukura ki te kōti

By Raniera Harrison

E rere tonu ana ngā wero mō te kapa toa whakaihuwaka whutupōro kura tuarua o te motu.

Nō te rā nei puta ai te whakatau a te tumuaki o te kāreti o Scots ki Te Whanganui ā Tara, e kore ia e wehi ki te haria te kapa o Raukura ki mua i te aroaro o te kōti.

Hēoi, hei tā Raukura, kua toa kē i a rātou i runga i te whīra whutupōro, ka toitū tonu anō rātou, ki te kōti.

Ā tōna wā pea ka noho ki mua i te aro o te kōti, te whīra tākaro hou mō tēnei tumuaki

He hanga kōtore whererei te wero nō te tumuaki o Te Kāreti o Scots, a Graham Yule, ki te uepu whutupōro kura tuarua o te motu mo te aheinga a tētahi tokorua nō Raukura  ki te tākaro i tēnei tau, ā, e whakapaetia ana ia he huhua noa ngā pātai e iri tonu mai ana.

Engari e ai ki te tumuaki o Raukura a Chris Grinter, ko te wairua hahani kua pēhia te kura ki raro i ngā wiki tata ki muri, kāore he kiko o roto.

Kua oti kē i a te uepu whutupōro kura tuarua o te motu tāna whakatewhatewhanga ki te āheinga o ngā kaitākaro, ā, e harakore tonu ana a Raukura. Hēoi, kāore anō kia ngata te whai a Scots.

Me te mōhio a Yule, ko te huarahi aporei ka tūpono kitea ki waho i te kōti

Arā te whio whakamutunga o te kēmu, ēngari te āhua nei kei tawhiti kē te mutunga o tēnei pakanga. 

Tuaritia: