He wānanga ahurea Māori mō ngā Warriors

  • Tāmaki Makaurau

E hoki wawe atu ana ngā kaitākaro o te kapa o ngā Vodafone Warriors ki ngā tuku ihotanga o tēnei whenua.

I hiahia a Donna Grant o te poari o ngā Warriors rāua ko Anaru Grant kia whai aronga atu ngā kaitākaro me ngā rōpū whakahaere o te kapa Warriors ki ngā āhuatanga o te iwi Māori.

Kia whai māramatanga hoki ai ngā kaitākaro ki te ahurea Māori.

Hei tā Anaru Grant, "Tā rātou tūmanako, kia kimihia te huarahi o te ao Māori nē.  Ki te awhi, ki te tautoko rātou i ngā pakanga i tēnei tau pea, me ngā tau e tū mai nei."

I tīmata ai ngā mahi akoako i roto i te whare kai, me tētahi whakamātautau reo Māori o te Mana Tohu o Aotearoa.

Heoi kore rawa tēnei e ārai i ngā hiahia o ngā waewae tapu.

He tuatahitanga tēnei mō ētahi o ngā kaitākaro i runga marae, otira ki te ako i ngā āhuatanga o te ahurea Māori.

He mahi haka e whai ake, me te aha e hīkaka katoa ana te wairua o ngā kaitākaro ki ngā mahi a Tūmatauenga.

He marama te kite e rata atu ana ngā kaitākaro me ngā kaiwhakahaere o te kapa Vodafone Warriors ki ngā āhuatanga o te ao Māori.  Heoi hei te marama o Huitanguru ka kite ai mehemea i whai hua rānei ēnei pukenga ki runga i te papa tākaro.

Kairīpoata:  Wepiha Te Kanawa