He tūranga Rarauhe Hiriwa te whai a Tairi

Rahia Timutimu

He taumata anō me eke ki te whakaingoatia anō a Courtenay Tairi ki te aro ā-kapa o ngā Rarauhe Hiriwa mō te tukinga tuarua ki a Ahitereiria mō te Ipu Constellation ā te Rāpare.  Koina tā te uri o Tainui i te whakangungu tuatahi o te kapa o Aotearoa whai muri i tā rātou wikitōria tuatahi i te Rātapu.

Hei tukinga ā-ao tuatahi māna, i tākaro te uri Māori nei i te haurua tuatahi i te tukinga tuatahi o te whakataetae Ipu Constellation, ā, he nui ōna akoranga nō te toru tekau mēneti a ia e tākaro ana.

E koa ana a Waimarama Taumaunu i te haere a Tairi i tana tukinga tuatahi, heoi hei tāna, me piki anō te taumata ki te eke anō ia ki te aro ā-kapa i tēnei wiki.

Ko te tukinga rā ko te tuatahi o ngā tukinga ā-ao hoki mā te uri Māori mā Joline Henry i tōna rua tau, whai muri i te whānautanga mai o tana tama i tēnei tau.

Kāti me whakataha ngā whakaaro ki te tukinga kua taha ake nei, ka anga kē ki te tukinga tuarua, ka tū ki te taiwhanga o Vector hei tēnei Rāpare.