Ngā kaupapa: Māori Sports Awards, Softball

He tohutanga tuatahi mā Brad Rona i ngā Tohu Tākaro Māori

Brad Rona - Māori Sports Awards finalist

Kātahi te tau mīharo, ko tēnei, ki te tautōhito poiuka ki a Brad Rona. 

I āwhina ia i ngā Tōkena Pango kia eke panuku i te ipu o te ao i tü ki Aotearoa i te tīmatanga o tēnei tau, ā, kua tohua hoki ia ki ngā whiringa toa o ngā tohu tākaro Māori o te tau.

E noho whakaiti ana a Brad Rona i tōna tohutanga tuatahi ki nga whiringa toa o ngā tohu tākaro Māori o Aotearoa.

Kua roa nei a Brad e whakapeto ngoi ana i te poiuka, ā, i tana whakataetae a ao tuawhā i tēnei tau, i āwhina atu ia i te wikitōriatanga a ngā Tōkena Pango i tēnei taitara nui whakaharahara.

Hei tā Brad, ko te mea mīharo o te kapo ake i te taitara ā-ao, i tū ki te wa kainga i mua i te aroaro o tōna whānau.

Engari, ka pehea te roa o tēnei uri o Te Ātiawa i tēnei hākina, he taitara ā-ao anō tāna e whai nei?

Ko tāna e whakapono ai, mā tōna tinana anō e whakamōhio ki a ia inā kei te reri ia mō tērā taumata.

Ahakoa e harikoa ana a Brad i tana tau mīharo nei, ko te tohutanga hei kaitākaro Māori o te tau te painga atu.