He tohu ā Ao mā Portia Woodman

James Perry

Kua whakaingoatia a Portia Woodman ki te rōpū whakaihuwaka kaitākaro wahine o te tau e te Uepū Hākinakina Wāhine i Āmerika.

E hia kē nei ngā tohu whakaihuwaka kua kapohia e Portia Woodman, hei ngā marama e kainamu mai pea ka eke rā ano ia ki ngā karamatamata. Ko ētahi o ngā whetū kua riro i te taonga nei ko ngā tuakana teina tēnehi, arā ko Serena me Venus Williams, ko te toki poitūkohu anō hoki, ko Lisa Leslie. Hei tā te kaitākaro wāhine o te Ao Whutupōro, "horekau he kupu mō tēnā, mō ngā āhua mō ngā mea kei roto nei."

Hei tāna anō, mei kore ko ōna hoa takaro e angitu ai ia. 

I roto i te tau kua hipa, kua riro i ā Woodman ngā Ipu o te Ao e rua. Ko te ipu mō ngā kapa 15 ka tahi, kā rua ko te ipu Takiwhitu. Ka mutu, i riro i tāna kapa i te metara kōura i te Whakataetae Hoawhenua anō hoki. Nā whai anō pea kua whai wā whakatā. Kua pau te hau, ā-tinana, ā-wairua, ā-hinengaro tāna i kī ai. E rikarika ana te uri o Ngāpuhi ki hoki ki te kainga whakatā ai. 

Nō te rangi nei tae atu ai a Woodman me ētahi atu o te kapa takiwhitu ki Te Awakairangi, poipoi haere i Ngā Mamaku ō āpōpō.

Mā te marea te toa whakaihuwaka o te Uepū Wāhine e tīpako mā runga ipurangi. Hei te marama o Whiringa ā Nuku tu ai te pō tuku tāonga ki te Āporo nui.