He tira tautoko kaha tā ngā Breakers

Whakapau kaha ana te kapa Breakers i tenei wiki kia rite ai rātou mo te tukinga pae tu pae hinga ki te kapa Melbourne Tigers a te pō nei, a ko tētahi o ēra kua whakapau kaha ki te hāpai i a ratou mo tenei tukinga, otira i nga tau takaro e whā kua hori, ko to ratou kaiako whakapakari tinana ko Steve Buckley no Ngāti Rangitihi.

He toa hākinakina a Steve, a koia hoki te kaiako whakapakari tinana o te kapa Breakers.

Hei tāna, “koinei taku wāhanga takaro tuawhā, waimarie kē kei i a hau ngā ringi e toru, e toru ngā wikitoria, inā he ahuatanga pai tēra.”

Ehara i te mea ko ngā whakaharatau waewae parahutihuti me ngā whakangungu raka noa iho āna mahi hei hāpai i ngā toa kua toru ngā ekenga karapipiti ki te karamatamata ANBL.

Ko tā Steve, “ko tāku mahi ano ko tāta tiaki i ngā kaitākaro kia koi a rātou tinana, ā rātou wairua hoki mo ngā kēmu, he mahi tino whakahirahira tēra.”

He kaipara ngahuru hoki a Steve, a ahakoa e whakataetae tonu ana ia, kā mutu i eke ia ki te tūranga tuarua i te whakataetae ā motu i tenei tau, e kaingākau ana ia ki te hāpai i ngā toa hākinakina o naianei, o anamata hoki, ā-tinana, ā-hinengaro anō. Na whai ano kua timataria tāna ake pakihi.

Marakerake ana te kitea o tana angitu i te kapa Breakers engari ko te tohu o te rangatiratanga ko tana ngakaunui ki te hāpai i ngā toa hākinakina.

A, koia pū te manako o te marea mo te kapa Breakers a te pō nei.