He timatanga pai mo te tauwhāinga Tri Māori

Rahia Timutimu

Ki te whakataetae Tri Māori i tū ki Karapiro inanahi, nui ake i te kotahi mano ngā tāngata i whakarauika atu nō te motu whānui ki te whakataetae i timata tuatahi ai i te tau rua mano tekau ma rua.

Nā te poto o te ara whakataetae kua tapaina ko Tri Māori Sprint, he haurua o te whakataetae Iron Māori. He kaukau whitu rau rima tekau mita te roa, he ekenga pahikara rua tekau kiromita te roa, a, he oma e rima kiromita te roa, ona wahanga. A, he kōwhiringa anō mā te hunga i hiahia oma noa.

I waenga i te hunga i whakawhiti i te rarangi whakamutunga ko Wiremu Bayliss, koinei te wa tuatahi i whakataetae ki te tauwhainga katoa, i tera tau i kaukau, i oma hoki ia.

I tera tau i aru matau a Te Kāea i a ia i tana huarahi, mai tera tau ki tēnei tau kua whakaheke ia e waru tekau kirokaramu.

Ko te tikanga, mo te maha o enei kaiwhakataetae, he whakangungu tēnei hei whakareri ia ratou mo te whakataetae IronMāori, hei te mutunga o te tau.