He taurite ngā rangatahi rīki Māori me Hāmoa

James Perry

Tē tāea te wehe i te kapa Māori o Tāmaki Makaurau, me te kapa tono o Hāmoa i tō rāua tukinga rīki mō ngā tamatāne i raro i te rua tekau tau te pakeke. Ko te tatauranga whakamutunga ko te rua tekau mā whā ki te rua tekau mā whā.

Ahakoa i kī katoa te tukinga o ngā kapa nei i ngā piro, i ngā piro hoki hēoi e harikoa ana te kāpene o Tāmaki Makaurau i te pakari o tāna kapa. Nō tainahi tonu nei rātou i tōpū atu, nā reira he ruarua noa iho ngā whakaharatau i a rātou.

Mō te roanga o te wehenga tuatahi ko Hāmoa a runga. Nā rātou te piro tuatahi. Nā wai, nā wai i piki ake te kounga o Tāmaki Makaurau - katahi ka riringi mai ngā piro. Ko te piro pai rawa pea he mea whakaoti e William Pompey i te whatinga rārangi ārai o Casey Smith.

He tekau mā ono ki te ono kia Tāmaki Makaurau te tatauranga i te weheruatanga. Hēoi, he tīremi mai, tīremi atu te āhuatanga i te wehenga tuarua. Kāore tētahi kapa i tino kaha atu i tētahi atu.  

I riro anō e Hāmoa i nga piro e rua, katahi ka whakawhiti a Smith mō tētahi piro.

Nā te pātata pea o te tatauranga ka ruku anō ngā kapa e rua ki ngā rētōtanga, kimi ai i te wikitōria. 

E rima mineti e toa ana ka koke ngā ihu o Hāmoa. Hēoi, i pai te whana hāmene o Smith i te mineti whakamutunga, arā ka taurite ai anō ai ngā tatauranga. 

Hei tā Phillip Makatoa, kaitakaro o Hāmoa, nā rātou anō i pērā ai, i ā rātou te kēmu, hēoi i āhei a Tāmaki Mākaurau kia koke whakamua, na wai i hāmene. Hēoi, hei tā Makatoa anō, koirā te āhua o te whutupōro.

E manako ana a Rangi kia tū anō he kēmu pēnei hei ngā tau e heke mai nei.