He tauira pai ngā Breakers mo ngā rangatahi o Te Taitokerau

Te Kāea

Ko te hīkoi i ngā tapuwae o ngā tohunga poitukohu te hiahia a Rewi McPherson, i te rā nei, i tae atu ia me tōna tima ngā Northland Suns ki te kaupapa wheako o ngā New Zealand Breakers.

E mau ana i ngā hū o Tai Wynyard, e aro ana ngā moemoeā o Rewi McPherson ki te rāngai poitūkohu.

E ai ki a Rewi McPherson, “Kua haere mai mātou mai te Tai Tokerau, kia whakawhanake i o mātou nei pukenga poitukohu."

Ko tēnei te wā tuatahi kua tau mai te tima Northland Suns ki te whakaharatau a ngā Breakers, nā tēnei wheako, ka tutaki anō a McPherson me Wynyard.

He hononga whakapapa i waenganui i ngā tokorua nei, ā, i tutaki rāua i ngā whakataetae reanga tekau-mā-whitu i ngā tau i pāhemo.

Kei te ngana a kaiwhakahaere Aaron Sadler ki te kimi huarahi kia ahei ai ngā taiohi o te Tai Tokerau te kite i ngā hua maha, e whakapono ana ia kei runga a Rewi i te huarahi tika.

Hei tā McPherson, “Ka eke ahau ki tēnei o ngā taumata, tēra pea te NBA, koira oku wawata.”

Mai i konei ko te mahi mō ngā Northland Suns, ko te uru atu i ngā wheako maha i rapuhia mai ngā Breakers, kia ahei te whakauru atu ki tō rātou oranga, e ai kia Sadler, "tētahi tamaiti i tēnei kōti, he tamaiti kore e uru ki ngā koti ture."