He tātua pango mō ngā Māori tokorua Clark Gracie

Aroha Treacher
  • Te Tai Rāwhiti

Kua whakawhiwhia ki te tokorua nei nō te Matau a Māui i ō rāua tātua pango Clark Gracie Jiu Jitsu, he tuatahitanga tēnei mō te rohe.

"E tū whakaiti ana ahau i tēnei wā, e whakaaro ake ana mō tōku whānau, ōku mātua me ngā aupiki me ngā auheke o tēnei haerenga," tā Marlon Hodges.

"He mea uaua rawa tēnei, he wero nui ki te whakangungu ahakoa i tūraki koe i ētahi wā, heoi, kei ngā rangi tūhāhā tōku wairua i tēnei wā, he tino harikoa," tā Kodie Hamilton.

Ko Clark Gracie, he toa jiu jitsu o te ao, nā tōna whānau i whakatū ai te taera nei o Gracie Jiu Jitsu, he kaupapa kua horapa ki te ao.

"Koinei te ikeikenga o tēnei momo whawhai, ko te whiwhinga o te tātua pango he mea tino nui," tā Clark Gracie, tumu whakarae o Clark Gracie Jiu Jitsu.

Kua whiwhi kē a Marlon, rima tekau mā toru ōna tau, i tōna tātua pango Shidokan nō te whare hākinakina o Putanga, koinei tōna tātua pango tuarua.

I tōna tau pakeke e rima e whakangungu ana a Kodie ki te ao whawhai i timata ia ki te Jiu Jitsu i tōna tau tekau mā whitu.

He tuatahitanga tēnei mō rāua i Te Matau a Māui nei otira mō tō rātou kura whawhai.