He tata ā-runga, engari he roa ā-raro

He tata ā-runga, engari he roa ā-raro.  Koinei te kōrero mō te kapa Emirates Tīma Aotearoa e whai nei i te wikitōria kotahi ki runga ake i te kapa Oracle o Amerika kia mau ai i a tātou te ipu Amerika. 

Engari nā runga i te āhua o te huarere, e whakaroatia ana te whakataetae.  Heoi kei te ngākau titikaha tētahi kaumoana pere rua Māori, ka whakahokia mai te ipu ki Aotearoa.

He matekiri te kanohi o te hunga nō Aotearoa - ko te hiahia kē kia kite i tō rātou kapa e hiki ake anō ai i te Ipu o Amerika.

He kaiwaka hēra a Rawiri Hahipene-Geddes mō te karapu Royal NZ Yacht Squadron.  

Ko ia tētahi i oho moata i te ata nei ki te mātaki i ngā rēhi e rua i waenga i te kapa Emirates Aotearoa me Oracle o Amerika.

Engari pērā ki ngā rangi ō-mua ka whakakorea te rēhi tuarua nā te kino o te huarere.

Ko tēnei uri o Ngāti Awa me Ngāi Tai tētahi o te tokoiti o Ngāi Māori e whai wāhi ana ki tēnei momo tākaro.  Ko te manako ia, hei ngā rangi e haere ake nei kia whai wāhi ia ki te kapa o Aotearoa. 

Hei te ata whakamātauria anō ai a Aotearoa kia hiki anō ai i te Ipu o Amerika.