Kaupapa: Touch Rugby

He taitara anō te arunga a Raukawa Ki Runga

  • Waikato/Te Waiariki

He taitara tuarua karapīpiti e arumia ana e ngā toa ā-motu o Te Whakataetae Pā Whutupōro Māori o te motu, e Raukawa ki Runga i tēnei tau. Ā, e titikaha ana te aro o te kapa nō Ngāti Raukawa i te urunga atu o tētahi toa nō te Whakataetae Ipu Rīki o te Ao.

Ehara i te mea ko te wikitōria o tēnei whakataetae anake te whāinga ki te kapa pā whutupōro o Raukawa ki Runga.

Hei tā te kaiako, hei tā Hika Pene (Ngāti Raukawa ki te Tonga, Ngāti Kauwhata), “Kei reira tērā wawata nui, engari ko te mea nui ko te whanaungatanga ki a mātou.”

Kua pakari ake te tīma i te urunga o Apirana Pewhairangi, kaitākaro Whutupōro Rīki nō Airani, uri nō Te Whānau o Ruataupare anō hoki. 

“Koinei te wā tuatahi kua tākaro au ki tana taha. Kotahi anake te kēmu kua tākaro mātou, engari he pai,” hei tā Alana Fraser (Ngāti Pikiao).

Kua angitū ai a Ngāti Raukawa ki ētahi atu tākaro pēnei i te rīki. Nā te reo Māori rātou i pērā ai.

Hei tā Pene, “He tokomaha ngā kaitākaro i te kāinga kua tupu ki te marae, ki te whare kai. Kei te mōhio rātou i te kotahitanga i roto i ngā mahi katoa.”

Kua tū tēnei tōnamana mo ngā tau rua tekau, ā, kua kitea e Pene ngā piki me ngā heke i tana ārahi i te kapa o Raukawa ki Runga.

“Ehara i te mea ko te pā whutupōro anake. Ko ngā pōhoro o tēnei kaupapa me tū nga kapa katoa ki te atamira, ki te whakangahau, ki te waiata, ki te haka. Kāore e kitea tērā āhuatanga ki ngā whakataetae pā whutupōro o te motu,” hei tā Pene.

Hei āpōpō ka tae atu rātou ki te pae o te riri, ki reira kite ai mena ka toa, ka hinga rānei.