He rā wikitōria kore anō mō Tīma Aotearoa

Rahia Timutimu

E tāria tonutia ana te wikitōria a Tīma Aotearoa i te ipu taiea o te ao whakatere waka.  Nō Oracle te rā nei, nā rātou i wikitōria te rēhi tekau mā whā, mā ngā hēkona rua tekau mā toru, me te rēhi tekau mā rima mā ngā hēkona toru tekau mā whitu.

Kei mua tonu a Aotearoa, e waru ngā toahanga ki wā Oracle e rima.

Kua wikitōria a Oracle i ngā rēhi karapīpiti e whā.  I te ārahi a Tīma Aotearoa i ngā rēhi e toru kua taha ake nei i mua i te whakakorenga o aua rēhi.

I riro i te kapa o Amerika te urunga tuatahi o ngā rēhi e rua i te rā nei, ā, nā tēnei i mate a Tīma Aotearoa kia rere whakawaho.  

Kia riro ai i a Aotearoa tā rātou wikitōria tuaiwa, me wikitōria i te tīmatanga, kia taea ai e rātou te tohu i te ara o Oracle.

Ka uru tuatahi atu a Tīma Aotearoa āpōpō, nā reira ko te matapae he wikitōria kei te haere.

Ahakoa te tatari roa, e ngākau whirinaki atu ana te kaiwhaiwhai Ipu Amerika a Haare Williams, hei tōna wā ka eke tō tātou kapa.