He pō taumaha ma Cameron

Rahia Timutimu

Ko te tukinga "riiki ki te whutupōro" tuatahi i waenga i te kaitākaro riiki o Ahitereiria a Sam Thaiday me te poumua a Ben Tameifuna

Mo ngā kaiwhawhai e rua, koinei te ekenga tuatahi ki te papa whawhai me te tau o ngā pukenga.

I kaha a Thaiday ki te whai piro, aa-oti noa te whawhai, kia riro i a ia te wikitōria.

Ko te whawhai o muri ake i waenga i toa hitararii a Paul Gallen me te amokura o te kapa Chiefs a Liam Messam, he toa no tera tau i hoki mai ki te ringi kia tumatakitahi, toa ki te toa.

He whawhai tātāhau i waenga i nga ika-a-whiro nei. Heoi ko Paul Gallen i toituu, oti ana ngā rauna e toru.

Ki te whawhai nui o te pō, i waenga i te toa heavyweight a Shane Cameron, kua hoki mai i te wahanga Cruiserweight, i tuki atu kia Brian Minto.

I tu rae ki te rae atu te kaiwhawhai toru tekau mā waru tau te pakeke ki a Cameron, kia motu ai te kiri o te uri Māori.

I whiua a Minto i te rauna tuarima mo te tuki aa-tuke, me tetahi atu ano mo te tuki aa-rae.

Pōturi ana te ahua o Cameron. Ahakoa tana hokinga mai ki tana wahanga makau, he uaua mōna te patu i tana hoariri.

He TKO te whai a Minto i te otinga o te whawhai whai muri iho i te rauna tuawhitu, nā te kapa a Cameron i tuohu, he kore no rātou e ahei te mutu i te heke o te toto i to rātou ika.

Ko te pātai ia, ka aha a Cameron a muri nei? Tēra te tūpono koinei te mutunga mo te kaiwhawhai Māori