Kaupapa: Rugby

He panonitanga i a ngā Ōpango Māori e ahu atu ana ki te tukinga ki Hapāna

Kotahi te rerekētanga i te kapa Ōpango Māori ka tuki atu ki te tira o Hāpana ki Kobe a te pō nei.

Kua uru atu te poumua a Joe Royal ki te paehihiri hei whakakī i te tūnga o Brendon Edmonds kua whara nei.

Ka nui te whakapono ki waenga i te kapa o Hapana, e whā a rātou wikitōria i ngā whakamātautau e whā kua hori, he pukenga nui tā rātou kaiako a Eddie Jones nā reira me matāra te kapa Ōpango ka tika.

Heoi haunga rā tēra, kua tipako te kapa Ōpango Māori i ngā kaitākaro i tino eke i te whakataetae ITM Cup, ā, hei tā tō rātou kaiako hei tā Colin Cooper, ko te wikitōria te aronga ka tahi, ka rua ko te ū ki te mana o te poraka.

I raru te rekereke o Brendon i te whakaharatau i te Rāpare, a ahakoa tana matangurunguru kua whai wahi anā a Joe Royal ki te paehihiri me te manako ka eke anō ia ki te papatākaro whai muri i tana ekenga tuatahi i te whakamātautau tuatahi ki Amerika i tērā tau.

Ka mutu, hei tā ngā kaiwhakahaere, ko te manako ka ora pai a Brendon mō te wiki e tu mai nei.