He nui te tautoko mā te kapa Māori e whai wāhi ana ki tētahi kēmu Punjabi

Haruru ana te papa hākinakina o Greerton i Tauranga inanahi, i te taenga atu o te kapa Wāhine Kabaddi tuatahi o Aotearoa , ki te whakaatu i o rātou pūkenga o tēnei hākinakina a te iwi Punjabi, nā runga i te tono a te Karapu Sikh Sports o Mataatua Rohe.

Ā, i tino harikoa taua iwi i te tū a tēnei kapa, he wāhine Māori katoa, ka haere hei kanohi mō Aotearoa, hei kai-kawe i te mana o tēnei tākaro ki te whakataetae Kabaddi o te ao, hei tēnei Whiringa-ā-Rangi.

He tuatahi mo Aotearoa, he tuatahi mo te iwi Maori, ano mo te iwi Punjabi e noho nei ki konei, ki te kite he tīma Kabaddi Wāhine e takaro ana i ta rātou hākinakina ki tenei whenua. Me te aha he wāhine Maori te katoa.

Kua rima wiki noa iho tenei kapa wāhine e ako ana, e whakangungu ana i te taha o ngā kaiako Kābaddi, engari haruru ana te papa i to rātou pakari me to rātou kaha.

Me te rere o ngā tautoko kia tū tenei kapa hei kanohi mo te iwi Punjabi o Aotearoa, ki ngā whakataetae Kabaddi o te Ao ka tū ki Inia, hei te marama o Whiringa ā Rangi.

Na reira e tika ana kia tautokohia tenei kapa Wāhine Māori e para nei i te huarahi i roto i te ao Kabaddi, e kawe nei i te manawahine ki mua i ngā karu o te ao.