He mana nui tā te tira Pulse

Rahia Timutimu

Eke hautoa mai ana te kapa Pulse, whai muri i tā rātou toahanga i te wā tāpiri o te tukinga ki te kapa Magic. Heoi, kāre he aha ki te kapa Steel, i ārai tonu atu i te hoariri.

E rua ngā kaikuru toa o te Ao ki ia pito o te papa, ā, piro atu piro mai, i hipa te hauwhā tuatahi.

Tata ana ngā kaute i te hauwhā tuarua, ā, puta atu ana ki te wehengarua he toru tekau mā tahi ki ia kapa te tatau.

Ko te tukinga tua iwa tekau mā iwa tēnei mā Irene van Dyk i te whakataetae ANZ, ā, i ea ana āna kurunga katoa mō te Pulse. Ka tōrunga te aro a te kapa Pulse i tēnei, ka arahi ake i te tukinga mā ngā piro e toru i mua i te hauwhā whakamutunga.

Ahakoa i eke mai ētahi kaitakaro hou ki te papa, tē aukatia te kapa Pulse. Wikitoria ana ko te kapa nō Te Whanganui a Tara, ono tekau mā rua ki te rima tekau mā whā.