Kaupapa: Rugby League

He māhanga nō Ngāpuhi kua uru atu ki te kapa Kiwi Ferns

Wikitōria Day

Kua waimarie te kapa Kiwi Ferns i te uruhanga atu o ngā māhanga nō Ngāpuhi.

Ko Sharnita rāua ko Shontelle Woodman ērā i whakaingoatia ki te tira i tēnei tau, ā, nō nā tata nei tūtaki atu ai a Te Kāea ki te tokorua e hīkaka ana ki te tākaro ngātahi i tēnei taumata tākaro, mō te wā tuatahi.

Koinei te tau tuatahi kua whai urungā ētahi māhanga ki te kapa Kiwi Ferns. Ehara a Sharnita i te tauhou ki te tira nei, engari anō a Shontelle.

E werohia ana ngā hinengaro, ngā tinana hoki o te tokorua nei i te uaua o ngā mahi whakangungu, engari, e pīkoko ana rāua ki te tukinga ki a Ahitereiria a tērā marama.

Kua aua atu i te tekau tau ētahi o ēnei wāhine e tākaro ngātahi ana i ngā tīma-ā-rohe, nō reira, anō nei he whānau kotahi rātau.

Kua whakaarotia ake e rāua ō rāua wawata mō te kēmu nui kei te aroaro, me ērā tonu kei te pae tawhiti.

Mā ngā tini pūkenga o ngā māhanga Woodman e eke ai te kapa ki te pae o angitū.