He koura ka toa i ngā kai-hoe waka kōreti Māori i te whakataetae ICF World Cup

Wikitōria Day

He koura te hua ki a Aotearoa i te whakataetae ICF Ipu Hoe Kōreti o te Ao ki Portugal i ngā rangi tata nei .

Ao ake i te toahanga i te tauwhāinga K1 500 i te Rāhoroi, i eke panuku a Lisa Carrington i tāna tino tauwhāinga, arā i te K1 200 inapō.

Kāre te angitū o Aotearoa i mutu atu i reira. Nā te uri o Ngāti Raukawa, nā Jaimee Lovett tana tira i ārahi ki te angitū i te tauwhāinga K4 500. He tuatahi mō tētahi tira nō Aotearoa te eke ki ngā taumata toa e toru i te whakataetae Ipu o te Ao.

Kei te tira K4 o Lovett, ko Aimee Fisher, Caitlin Ryan and Kayla Imrie, ā he tira kē hōu tēnei kua whakangungu tahi i ngā marama tata ake nei. I tērā tau, kāre i eke te tira K4 o Aotearoa ki ngā taumata toa e toru, engari nā ngā toto hōu, i taea e rātou tērā te whakarerekē ake i tēnei tau. I toa rātou ki a Poland me Hungary mō te mētara koura.

Ko ngā pūkenga o te toa whiwhi koura Orimipia nō Te Aitanga-a-Mahaki, o Carringaton i hora i te whiringa toa o te K1 200. I roto i tōna waka Nelo hōu, kua tata oti anō i a ia tēnei tau ki tawhiti noa atu o Yusmari Rodriguez nō Cuba. E toru tekau mā iwa ira rima whā iwa hēkona te wā ki a Carringtion.

E anga atu ana te titiro a ngā kai-hoe o Aotearoa ki te tuarua me te tuatoru o ngā whakataetae ipu o te ao ki Germany me Denmark hei ngā wiki e haere ake nei, i mua i ngā whakataetae o te ao ki Itāria hei te Here Turi Kōkā.

Kei raro nei, ko ngā whakaahua o ngā rēhi me te whiwhi mētara.