Kaupapa: Rugby

He kēmu whutupōro hei whakahōnore i a Jimmy Grbich

  • Te Whanganui-ā-Tara

I tuki rae ki te rae ngā tino hoariri whutupōro o Pōneke me Oriental-Rongotai i tētahi tukinga motuhake hei whakanui i te toa whutupōro Ōpango Māori o mua, me tautōhito o te karapu Poneke a Jimmy Grbich, ā, kātahi te pakanga ko tēnei.

He tukinga kua roa nei e tū ana, e rima tekau ōna tau.

Ehara i te mea he kēmu whutupōro noa iho, e mōhio ana ngā kapa e rua ki tōna hiranga.

E ai ki a Whetu Henry, "Ko Jimmy Grbich tōna īngoa, kua mate i ngā rā o mua, he kaitākaro mō te tīma o Pōneke engari ko te taonga mai i tētahi o ngā kaitākaro mai Ories."

"He tino taonga te Jimmy Grbich ki a mātou, me kiia rā te Battle of the Cutting ki waenganui i a Pōneke me ngā Ories.Pērā i ngā tau kua hipa, he tino tukinga tēnei, ka puta te ihu o tētahi kapa," te kōrero a Doug Jones nō Pōneke.

I te haurua tuarua ko te hau kāinga ko Pōneke i ārahi i te tukinga engari i whakaitia tērā āputa nā tēnei tuku, he piro anō te hua ki te kapa Ories.

I ngā mēneti whakamutunga, i mua a Pōneke mā te rua māka, engari kāhore te hoariri i takoto noa, ka kapohia te wikitōria me te hīra Jimmy Grbich i tēnei whana hāmene.

Heoi ko tā Henry whakahau, "He uaua tērā kemu engari i tākaro mātou ki te mutunga, koirā te mea matua, i mea atu ki nga kaitākaro i te tīma me tākaro koutou ki te whakamutunga."

Kua rongo hoki a Pōneke i te kounga o tēnei tukinga.

"He uaua i ngā wā kua pahure, he uaua ināianei nā reira kei te eke haere tērā taumata," hei tā Jones.

Ahakoa ko wai te toa i tēnei tau, ko Jimmy Grbich tonu tērā i whakanuia ki runga i te papa tākaro.