Kaupapa: Rugby League

He kapa nō Matata e kōingo nui ana kia kapo ake anō i te taitara toa ki te tauwhāinga Whutupōro Rīki Māori ā-motu

Wikitōria Day
  • Waikato/Te Waiariki

I a tātau e whakatoitoi atu ana ki te Tauwhāinga Whutupōro Rīki Māori o te motu, tērā tētahi kapa e kōingo nui ana kia kapo ake anō ai i te taitara toa o te wāhanga Waka. Nō nā tata nei whai wāhi atu ai a Te Kāea ki ngā mahi whakangungu a te kapa e kiia nei ko Ngāti Umutahi, he kapa nō Matata, i Te Waiariki.

I tā rātou hoki mai ki te whakataetae me te wikitōria, ahakoa ō rātou tau tekau e tāmo ana, ko Ngāti Umutahi kei te manawareka i ngā hua o te uru ki te whakataetae Whutupōro Rīki Māori o te motu. 

Hei tā Hammond Matua, "Neke atu i te waru tekau paihēneti o ngā kaitākaro o te tīma, he toto kotahi, he whānau kotahi me kii, kaihanga tuatahi me kī. Kua hoki mai anō ētahi o o mātau whanaunga i Ahitereiria hei whakawhanaunga mātau ki a mātau anō i tēnei wāhanga o te tau."

Ahakoa he kapa kē tēnei nō Matata, ko ōna kaitākaro nō ngā pito maha o Aotearoa o Ahitereiria hoki.

E ai ki a Hammond Matua, "Etahi i hoki mai i Ahitereiria, ētahi nō te Nōta, ētahi nō te Tonga, nō reira, kua whai wā mātau i te rā nei ki te whakakotahi mai i a mātau, ki te whakangungu i a mātau anō ki te whakataetae."

Arā hoki ētahi kaitākaro kua uru mai ki te tira mō te wā tuatahi. Ko te uri o Maniapoto me Tainui, a Aaron Woodhouse tētahi o rātau.

Tua atu i ngā whakaharatau ā-tākaro nei, ko ngā whakaharatau haka hoki tētahi o ngā tino aronga a te tira.

E māhaki ana ngā whakaaro o Matua mō tā rātau ekenga anō ki te tūranga tuatahi a te mutunga wiki nei.

Ka takakawe tahi rātau kia riro mai anō ai i a rātau ēnei taonga.