He kaitākaro poitūkohu Māori e tuanaki atu ana ki tōna pae tawhiti

He tokomaha ngā uri Māori ka whai wāhi atu ki te kēmu poitūkohu, engari me uaua ka kitea he kanohi Māori i ngā papa poitūkohu o Amerika. Hēoi, koia pū tā Michelle Nicolls o Ngāti Tūwharetoa, kua whakawhiwhia ki tētahi karahipi poitūkohu ki tētahi kura tuarua o reira.

Tūtaki mai ki a Michelle Nicolls, he uri o Ngāti Tūwharetoa, he toa hoki ki te poitūkohu.

E waru ōna tau, ka whai wāhi tuatahi ia ki tēnei hakinakina. Ināianei kua tekau ma ono ōna tau, ā, kua whakawhiwhia ia ki tētahi karahipi poitūkohu ki te kura tuarua e kīia nei ko Life Centre Academy ki Amerika.

Hei tā Michelle, “He rawe. Kua roa nei au e moemoeā ana kia haere ki reira tākaro ai”

Nā Carl Buck tēnei huarahi i whakarite mā Michelle, kua arahina e ia te whetū mahuta nei kia eke ai tōna taumata tākaro, ā, hei tāna kei a ia ngā pūkenga kia eke panuku i te ao poitūkohu.

Ko tā te kaiako, tā Carl Buck e mea ana “Ko ia tētahi o ngā tino kaitākaro, ā, ko ētahi mahi e tāea ana e ia, kāre hoki e tāea e rātou”

He kaitākaro a Michelle i te kapa tekau mā waru tau heke iho o Aotearoa, ā, he mema hoki ia o te kapa wāhine o Waitākere, engari mōna, he haerenga whakahirahira tēnei.

Hēoi i tēnei wā poto i mua i tana wehenga atu ki whenua kē, ka aro tahi atu a Michelle ki te whakakoi i āna pūkenga.