He kaitakaro Kiwi kua tohua ki ngā Tohu Kaitākaro Rīki ā-Aō

Tokoono ngā kaitākaro Kiwi kua tohua ki ngā Tohu Kaitākaro o te Tau i te Rīki ā-Ao ka tū ki Ingarangi āpōpō. Ko Issac Luke nō Taranaki rāua ko Jared Warea-Hargreaves nō Te Arawa ngā uri Māori ka whakataetae mō te toa o te tau i ngā tūnga poumua me te tū whāngai.

Āpiti atu, ko Sonny Bill Williams, ko Roger Tuvasa-Sheck, ko Shaun Johnson, rātou ko Kieran Foran kua kōwhiria mō ō rātou nā tūranga. Heoi ahakoa ērā angitu, kotahi tonu te aronga o te kapa, arā te whiringa toa o te Ipu Rīki o te Ao ki ngā Kangarū hei te ata Rātapu nei.

Kahore ano ētahi o ēnei kaitakaro Kiwi kia wikitoria i runga ake i ngā Kangaru, ā ko poutoko Kieran Foran tētahi o rātou.

Ko tā Foran, “kāore anō au kia wikitoria ki ngā mea o Ahitereiria, nareira kei reira te hiahia nui kia patu i a ratou.”

Kahore e kore he whakataetae nui kei te haere ake ki waenga i a Kieran me tana hoa takaro no Manly a Daly Cherry-Evans, a hei ta Kieran tē ohorere i a ia tōna hoa ki runga i te papatakaro.

Ko te raro whiringa whāiti kua kaha whakapāhotia ko tērā o te piro whakamutunga a Shaun Johnson, engari ko te whiu a Dean Whare ki a Roger Tuivasa-Sheck tētahi atu o ngā miharotanga o taua kemu ki a Ingarangi.

Me eke ano te taumata tākaro a Dean ma i enei rangi okioki kia mau tonu ai ta rātou taitara ipu o te ao ki ngā Kangaru, engari ki te whāia te whiringa whāiti kei noho ka pono-kore ki ngā Kiwi.