Kaupapa: Rugby

He hua tō te hūnuku mō Manihera

  • Waikato/Te Waiariki

Kua kitea ngā hua o te hūnuku a te kaitākaro Blues o-mua, a Jordan Manihera ki Waikato whaimuri i āna piro e ono mō te tātāwhāinga Ipu Mitre 10.

Kāore i tua atu i a Manihera me āna piro, e whakapaetia ana ka kuhu pōraka pango ia hei te mutunga o te tau.

Nā ēnei piro kua kitea a Manihera e te tini me te mano.

“Ko ngā hoa kē, ko te kaipiro noa iho,” nā Jordan Manihera (Tainui, Ngāti Maniapoto).

He tangata hūmarie a Manihera, ēngari ka whakamānawatia e ia ōna hoa.

“Kāore au i te mōhio. He rawe ngā kaitākaro o tēnei tīma kua pukumahia katoatia.”

Nā ana tākaro pai ka whiwhi tēnei poutaha i ngā hōnore nui. 

“He honore kia tū mā te motu, heoi ko te tū hei Ōpango Māori e tākaro ana ki Vancouver, he wheāko ka kore rawa e kite.”

Kei Kirikirioa ia, ā, kei te ako ia i tōna whakapapa no Tainui.

“I ngā tau e rua, kua ākona ngā hītori e au, mea rawa ake he rima mēneti te tawhiti o tōku kāinga ki a Marae o Hukanui, koia nei te Marae o tōku whānau. He whakahirahira tērā āhuatanga nōku.”

He hua tāna hūnuku atu i Te Raki Paewhenua ki Waikato.

“Kātahi te timatanga pai ko tēnei ki au, ā nā tērā au i ū ki ngā mahi ,kia taea e au te tutuki ngā wawata. He mīharo tēnei tau ki au.”

Ka aro te titiro o tana kapa a Waikato ki Whangarei mo tā rātou tukinga ki a Te Tai Tokerau, ki reira hoki te rārangi piro e tatari mai ana ki a ia.