Kaupapa: Cricket

He hononga kaha tā Ngāi Tahu ki ngā Pōtae Pango

He hononga nui tā Ngāi Tahu ki te kapa Pōtae Pango o Aotearoa. Tokorua o a rātou kaiepa, ko to rātou kaiako mahi epa anō hoki nō te iwi o Te Waka o Aoraki, hāunga anō o rātou pānga ki iwi kē.

I whai wāhi a Te Kāea ki te kōrero ki te tokotoru nei i Poipiripi, i mua tonu i te tukinga nui whakaharahara rawa.

Ko Trent Boult, Ko Kyle Mills rātou ko Shane Bond he uri nō Tahu Potiki.

E ai ki a Shane Bond, i a ia e tamariki ana he nui ngā wā i hāere ia ki Kaikoura noho ai ki te taha o tōna whānau, ko āna tamariki tokotoru kei te whai i ngā mahi a rēhia i tēnei wā, ā e kaha rata atu ana rātou ki ngā mahi kapa haka.

Ko tā Kyle Mills. He hononga whakapapa nōna ki a Bluff me Riverton heoi ko ngā reanga e toru kua pahure kua noho ki Te Taitokerau.

Hei tā Trent Bolt he uri no Ngāi Tahu me Ngāti Porou, i whakapou kaha tōna kuia me tōna koroua ki te whakatō i te wairua Māori ki roto i a rātou, ā i tipu ake rātou ki runga i a rātou marae.

Kua taiea te tū o Trent i te ipu kirikiti o te ao, e ārahi ana a ia i te rekoata mō te nuinga o ngā wikiti i te whakataetae, rua tekau mā tahi i tēnei wā, otirā e rima o ērā wikiti ki runga ake i tā rātou hoariri mā āpōpō, arā ko Ahitereiria i ngā tukinga ā puna.

Ahakoa kāhore anō a Kyle kia tākaro i te ipu o te ao, e mihi ana a ia rāua ko Trent mō ngā mātauranga kua whāngaia e Shane.

Heoi ko te aronga matua inaianei ko te tukinga nui āpōpō me te whakahirahiratanga o tērā huihuinga.

He nui ngā kōrero e rere haere ana mō te rahi o te papatākaro MCG me te wero nui kia tūtaki a Ahitereiria ki tō rātou kāinga engari whakapono ana a Shane i ōna whanaunga me te katoa o te kapa.

I haere toa atu, ko te tūmanako ka hoki toa mai.