He hiahia nō ngā Warriors kia noho tonu ki te taumata

James Perry
  • Tāmaki Makaurau

He pakanga nui kei te haere mō te kapa Warriors, e noho nei ki te tūranga tuatoru o te whakataetae NRL. Ka tuki rātou ki te kapa tuawhā, ki ngā South Sydney Rabbitohs. Ki te wikitōria ka noho tonu ngā Warriors ki te tōpū tokowhā, hēoi ki te hinga, ka puta pea rātou i taua rōpū mō te wā tuatahi o te tau.

Nō tōna whaiāipo e kaha hapu ana i mahue te kāpene a Roger Tuivasa-Sheck ki te kainga i te tukinga ki a Parramatta i tērā wiki, hēoi kua hoki anō ia ki te aro ā kapa mo te tukinga nei ki ngā Rabbitohs. Hei tā te kaiako, hei tā Stephen Kearney he mea pai tērā nā runga i ngā pukenga o Tuivasa-Sheck.

He kaitā rawa ngā poumua o ngā Rabbitohs, hēoi ēhara i te āhuatanga tauhou ki ngā Warriors, hēoi ko te mea nui kia Kearney me kōtahi te hoe o te waka e wikitōria anō ai tāna kapa.

He wiki whakatā tā ngā Warriors ā tērā wiki, nā whai anō e hiahia ana a Adam Blair kia tukuna te katoa e tāna kapa i tēnei wiki. Ka mutu, hei tāna anō kua piki heke te āhuatanga o te kapa i ngā wiki tata nei, nā reira me whakatikahia i tērā.

Nā te āhuatanga o te whakataetae NRL i tēnei tau, ki te wikitōria ngā Warriors ka eke anō pea rātou ki te tihi o te arawhata ki te taha i ngā Dragons. hēoi ki te hinga rātou ka heke kē rātou ki waho o ngā tima tokowhā matua.