Kaupapa: Rugby

He haerenga momoho mā te kapa Ōpango Māori

  • Tāmaki Makaurau

Kua hoki manahau mai te kapa Ōpango Māori i tā rātou haerenga ki te taharaki o Amerika.

I eke panuku rātou i ngā tākaro whakamātautau e rua ki a Kānata me Amerika, kia ū tonu ai te mana o te poraka me te kapa.

Ā, hei whakamihi i tō rātou angitū, kua tohua te kaiako a Colin Cooper me te kapa anō ki ngā whiringa toa o Ngā Tohu Tākaro Māori mō tēnei tau.

Harikoa ana ngā toa whutupōro nei kua hoki mai ki te wā kāinga, ā, e whakamanamana ana i a rātou mahi rangatira ki tāwāhi.

Hei tā tētahi kaitākaro, tā Tim Bateman (Ngāi Tahu), i mōhio rātou he hoariri mōrearea i mua i te aroaro engari i eke panuku, ki runga, ki waho hoki i te whīra.

I kii te kaiako, a Colin Cooper, ki te aro atu ki tā rātou kēmu whakamutunga, i pau te 76 mēneti i a rātou kia wikitōria te kēmu, nā te wairua rātou i eke ai.

E noho whakaiti ana hoki a Colin Cooper i tana tohutanga ki ngā whiringa mō te kaiako toa o te tau, ki ngā tohu tākaro Māori o Aotearoa.

Hei tā kaiako, ehara tā rātou ekenga i te toa takitahi, engari he toa takitini kē.

Kua whai wāhi hoki te kapa Ōpango Māori ki ngā whiringa mō te kapa Māori toa o te tau.

E whakapono a Cooper i tū rangatira rātou hei kanohi mō te iwi Māori, nā whai anō tana whakahīhī ki te kapa.

Hei tā Bateman, i mārakerake te kitea i te aronga nui ki a rātou, ko te whutupāoro me ngā āhuatanga Māori i whakarangatirahia ki tērā pito o te ao.

Tae atu ki ngā rā, e rua i pau katoa ngā tīkiti, kahore e kore he tino painga kua puta mō te ao Māori.