Kaupapa: Rugby League

Haruru kau ana ko Taranaki i ōna uri rīki

  • Te Tai Hauāuru

E rere kau ana te whakataetae Rīki Māori e rua rā te roa o Taranaki Whānui.

E waru ngā kapa e kakari ana mō te hōnore nui.

Ko ngā kapa e waru nei he mea e whakatinanahia ana e ngā iwi, hapū, rōpū anō hoki o te rohe o Taranaki. E ai ki te kaiwhakahaere, ki a Wayne Capper, he mea nui te whakakotahi i ngā ahurei pēnei i tēnei, te tākaro tahi anō hoki a ngā iwi o te rohe.

Ko ētahi whāinga matua o te whakataetae nei, ko te whakatenatena i ngā whānau ki te whakapiki i ō rātau hauora, ki te tākaro anō i te hākinakina nei.

E ono o te waru ngā iwi o te rohe e tākaro ana, waihoki ko te tākaro i ngā rekereke o tō rātau maunga he ahuatanga kāmehameha ki a rātau, e ai ki a Wayne Capper.

E toru ngā kapa Taranaki Whānui ka kōwhiria hei māngai mō te rohe i te whakataetae rīki Māori o te motu ka tū ki Tāmaki hei te Whiringa-a-nuku. Koinei te wā tuatahi ka puta a Taranaki mai anō i te tau 2009, ki te whakataetae nei.

Ko tētahi kapa ka tākaro ki te wahanga Rohe, mō te hunga toa; ko tētahi ki te wahanga Waka, mō te hunga e whanake tonu ana. Ko te kapa tuatoru ka tākaro i te wahanga mō ngā wāhine.

Ka tīmata he whiringa toa hei te 2:30 i te ahiahi nei.

Mātakitaki mai i Te Kāea hei te 5:30 mō ngā mokamoka me ngā wenewene.