Gridiron dream lives on for Kātene

Rahia Timutimu

Ehara i te mea ka kitea whānuitia te hākina Whutupōro Amerika ki Aotearoa, pēra ki te whutupōro, te rīki hoki, engari ki tētahi uri Māori, koinei tana tino hākina. Kātahi anō ka whakaingoa ko Te Puoho Kātene ki te kapa matua o Aotearoa, arā te kapa Steel Blacks, i whakaingoatia tuatahitia a ia ki tēnei kapa he tekau mā tahi tau ki muri. I kōrero ia ki au i tāna ekenga ki tēnei kapa, i te rangi nei.

He āhuatanga kua roa e tāria ana e Te Pūoho Kātene.

“Ka tū whakaiti mai, he mea miharo māku,” hei tā Kātene.

Nō tēnei wiki i whakaingoatia te uri Māori nei ki te kapa matua o te motu, ka tākaro ki te kapa o Hāmoa ki Amerika hei te marama o Hōngongoi

“Ka tū te whakaharatau tuatahi mō matou i te wiki kei te haramai nei, ehara i te rangirua, kei te hihi te ngākau, engari mōhio kē au he maha te mahi kei mua i au.”

Toru tekau mā tahi tau te pakeke o Te Pūoho, ko te whutupōro Amerikana e papupapu ana i te toto. Nōna e rua tekau mā tahi tau ana te pakeke, i whakaingoatia tuatahitia ia ki tēnei kapa matua.

"I takaro taku pāpā i tēnei hakina ki Poneke, 30 tau pea ki muri, i tana taiohitanga i pa mai nga ahuatanga pai ki au, i ahau e haere ana ki te kura tuarua, ka takaro tahi au me taku papa, aku tuakana ki roto i te kapa kotahi, ka tipu te ngākaunui.”

Heoi, he hanganga ā-tinana tōna kāore e kaha kitea i roto i te whutupōro Amerikana. Rima pūtu te tāroaroa, otirā, waru tekau mā rua kiro karāmu noa iho tōna taumaha. Hei tāna, ahakoa te iti o te matakahi, ka pakaru tonu i a ia te totara.

“Ahakoa te poto, ahakoa te iti, me mohio koe ki tō mahi, ahua mohio ki to tunga, na konei ka taea e koe ka tātāri i ngā mahi o te hoariri, te aukati ia rātou whakaaro”

Ā, koia hoki te waiaro e tutuki ai i a Te Pūoho ōna moemoea.