Kaupapa: Indigenous

E whakatairanga ana a Anderson i tōna ahurea ki te Ao

James Perry
  • Tāmaki Makaurau

Kua tāngia tōna ahurea ki te kiri e poho kererū ana a Kyle Anderson e whakatairanga ana i Iwi Moemoeā ki te ao.

Ko tōna ingoa mōkai ko "The Original" e whakaatu ana i ōna hononga taketake ki te whenua moemoea. Hei tāna, e harikoa ana ia kua whai wāhi ai ia ki te whakatairanga i ngā mea pai o tōna ahurea ki te ao, ka mutu, me whakahihi ki ō rātou angitu, ka tika.

He uri o te iwi Noongar nō te Urupū ko ia te uri Moemoea tuatahi ka angitu i tētahi whakataetae World Series of Darts i tērā tau. Nānā a Corey Cadby i tūraki i e whiringa toa i Tāmaki Makaurau i tērā tau. Koia tana wā tuatahi ki te taone nui, heoi kua tae kē ia ki Te Papaioea i roto i ngā tau. 

I kaha tākaro ōna mātua i te whiu kōpere. Nōnā e tamariki ana, kāore ia i te paku rata ki te hākinakina. Heoi, e 9 ōna tau ka pōwhiri atu tana pāpā kia whakakapi i tētahi tūranga ki tāna kapa, mai i taua wā, ā mohoa nei kua kaingākautia ia.

Kua roa ia e noho nei ki Ingarangi, whai haere i ngā mahi whiu kōpere, heoi kāore ia mō te kī kei te whakatīnana ia i te maruāpo tūturu nei. Kei Ahitereiria tonu tōna whānau e noho ana, tōna ipo me tō raua tamaiti. 10 marama ia tau te roa o tana noho ki Ingarangi, na whai anō ka hoki ia ki te kainga, kua parea ngā kōpere ki te taha, kua whakakorengia a Kyle Anderson, kaiwhiu kōpere, kua tū ko Kyle Anderson, pāpā. He kupu āwhina kua tukuna e ia ki ētahi atu, pēnei ki te toki Māori ki a Cody Harris. Hei tā Anderson, ka hoki ki te kainga, tukuna ngā kōpere kia moe, e āhei ai te whānau kia riro i a pāpā.

Nō te ata nei tōpu ai ngā kaiwhiu kōpere whakaihuwaka e waru o te Ao, me ngā kanohi e waru o Te Moana Nui a Kiwa ki Tāmaki Makaurau kia kite i te rārangi tākaro mō tēnei tau. 

Ko te hoariri tuatahi mō Anderson he uri Māori, ko te kaihahaupōro ō mua, ko Haupai Puha. Hei tā te "Original", kāore ia te tino mōhio kia Puha, heoi kua kī tāna hoa, a Warren Parry me tūpato a Anderson kia Puha. 

Hei āpōpō timata ai te whakataetae Auckland Darts Marsters tuawha ki Trusts Arena i Ōpānuku.