E whakarite hāere ana ngā tira o te whakataetae Oceania Indigenous Cup

Wikitōria Day

A tēra marama ka tū te whakataetae whutupōro kahaki rīpene, e kiia nei, ko te Ipu Oceania Indigenous Cup, ā, i tēnei wā e takatū ngātahi ana ngā kaitākaro Māori o Tāmaki Makaurau. I whai hāere a Te Kāea i ētahi o ngā kaitākaro rangatahi.

I rere te wairua takaahuareka i tē rangi whakangungu. Ko ngā reanga Māori maha ērā i tae mai ki te papa whutupōro o Manukau ki te paihere anö i te whakawhanaungatanga ki waenganui i a rātau, i mua i te whakataetae nui kei tō rätau aroaro.

Ko tā Hilda Peters o Te Aupōuri, “i mua i te Kirihimete i te parakatihi mātau. Kātahi a muri i te tau hōu ka tae mai anō tātau, ka parakatihi anō tātau.”

Ko te nuinga o ngā kaitākaro i tae atu, he pakeke, engari, i reira hoki te hunga mātātahi. Ki tā Savannah Mätua titiro, kua whakawhanake haere tēnei hākinakina ki waenga i te hunga rangatahi.

Ko tā Savannah Mātua, nō Ngāpuhi me Te Arawa, “kāre te tokomaha o ngā kōtiro i te tākaro, engari, inaianei, mēna ka titiro atu ki te whakataetae-ā-motu, kei reira te nuinga o ngā tīma kōtiro ki te nuinga o ngā tama.”

Ahakoa he ihu hūpē ētahi o rātau ki tēnei tūmomo whakataetae nui, kei te hihiri tonu te ngākau.

Ka tū te tātāwhainga Oceania a te 28 ki te 30 o Poutū-te-rangi ki Tāmaki Makaurau, ä, kotahi tonu te tōmina nui.