E whakarite ana tētahi tama nō Ruatoki mō te whakataetae tēnehi ā-motu

Wikitōria Day
  • Waikato/Te Waiariki

Inā te nui o ngā tutukitanga a te uri o Ngāi Tūhoe a Te Kani Williams i roto i āna mahi tēnehi.

Ko ia kei te tūranga tuatahi i te reanga mā ngā kaitākaro tekau mā ono tau te pakeke heke iho o Aotearoa, ā, hei ēnei rangi okioki rere atu ai ia ki Ōtautahi ki te whakataetae mā taua reanga tonu. 

Nā tōna aroha ki te tēnehi ia i kawe ai ki tāwāhi, ki ngā whakataetae ā ao, ā, tērā tētahi wā i whakangungu ia i ngā papa tākaro o Pāniora mō te rua marama.

Ehara i te mea he māmā te huarahi kua takahia e Te Kani. I te tau rua mano tekau mā rua i whara tōna whatianga, ā, i tērā tau i whati tōna ringa. Ahakoa tēnā, i whakarīrā tonu ia. 

Nā tōna wairua kipakipa ia i angitū ai. Mā tēnei ia e eke ai ki ngā taumata e tūmanakotia ana.

Ka haere ia ki te whakataetae a tērā wiki me te tūmanako ka mau tonu i a ia taua taitara toa ā-motu.