Kaupapa: Fitness

E whakarīrā ana tētahi tokorua Māori kia eke i te ao CrossFit

  • Tāmaki Makaurau

He tungāne, tuahine Māori nō Te Arawa e takatū ana ki te whakataetae crossfit Two 2 Tango ka tū a te Mahuru. E hia kē nei ngā marama rāua e oho moata ana ki te whakangungu ngātahi, ā, he tohu tērā o tō rāua pūkākā kia angitū i te ao crossfit.

Ehara i te mahi māmā te ara ake, i mua i te koekoe a ngā manu.

Heoi, ahakoa ngā whiu a Hinetakurua, ka puta tonu rāua ki te aroaro o māeke.

He tauwhāinga takirua a Two 2 Tango. Nā Lisa tana tungāne i akiaki kia tāngia tōna ingoa ki ngā pepa rēhita. 

Ko taua āhua kipakipa rā anō te tuāpapa, ā, kōia kei a rāua mō te arohaehae i a rāua anō.

E rua marama e toe ana kia ara mai te tātāwhāinga uaua nei, ā, he whakapakari ake i ngā āhuatanga katoa o tēnei hākinakina te whai.