E wero atu ana ngā waewae parahutihuti Māori ki te ao

  • Tāmaki Makaurau

Ehara i te mea kei ngā mahi kaiaka te mātotorutanga o te iwi Māori, engari ko Rochelle Coster nō Ngāti Kahungunu tētahi kua eke ki ngā taumata i tēnei momo tū hākinakina. Kua tae tuatahi mai ia te oma tere kotahi rau mita te roa mā ngā wāhine i te whakataetae kaiaka o Tāmaki Makaurau i ngā rangi okioki kua hori, engari kāore ia mō te whakatā noa atu, he whakataetae anō tāna hei tēnei wiki.

Hei tā te uri o Ngāti Kahungunu nei, tā Rochelle e mea ana “ko taku tino kai, me kii, ko te oma tere kotahi rau mita te roa, ao te pō, pō te ao”

He rua tekau mā rima tau noaiho te pakeke o Rochelle, ā, he pērā tonu tōna hiakai ki te oma tere i tērā o tōna ohinga.

Hei taana anō “ko te wairua e rangona ana i a koe e oma ana tērā e whakaoho nei i ahau, me te mōhio anō hoki, e pīkoko ana kia eke panuku, kia eke Tangaroa, ā, koira tonu pea i pupū tonu ake ai te hiahia kia whai atu rā i ēnei momo mahi.”

Whai muri i tētahi wharanga kikino i tērā tau, harikoa ana a Rochelle i āna hua i te whakataetae kaiaka o Tāmaki Makaurau kua pahika nei. I whakaihuwaka ia i te reihi oma tere kotahi rau mita, ā, he whakataetae anō tāna hei te Rāhoroi e haere ake nei.

Ka whakahua mai a Rochelle “kei te kainamu mai rā te taiopenga kaiaka Grand Prix o Tāmaki Makaurau, he hui ā motu tēnei, ā, mō muri iho i tērā, ka huri te kei o te waka ki Poihākena, ki reira pakanga atu ai ki te hunga kaiaka i reira, katahi ka huri whakatekainga mai”

Heoi anō, ko tana whainga matua i tēnei tau he whai wāhi atu ki ngā taumāhekeheke hoawhenua ka tū ki Kotirangi.

Nā reira rā, e mārakerake ana te kitea he nui ngā mahi kei mua i a Rochelle a ngā marama tata nei, kia tutuki ai tērā whainga kia eke ai ia ki tērā ātamira nui o tōna ao hākinakina.