Kaupapa: Koroneihana

E tukituki ana ngā hoariri i te Koroneihana

  • Waikato/Te Waiariki

Ko taua whakataetae anō rā i waenganui i ngā kapa i te wāhanga rīki o te Koroneihana i tēnei tau.  Kotahi wiki i muri i te whiringa toa ā-rohe i waenga i ngā kapa tuakana, i tuki ko ngā kapa teina o Taniwharau me Tūrangawaewae i roto i te whakataetae rīki rangatahi.

Nō mai rā anō kua tuki rae ki te rae ēnei kapa, ā, mō te rīki anō te take.

Hei tā Lionel Wairau, kaiako o Taniwharau, “He tino pakanga. Koina he pakanga. I runga i te whīra he pakanga.

“Ko te kaupapa ia, ko te manaakitanga, ko te whanaungatanga,” nā Tamiaho Herangi-Searancke, kaiako o Tūrangawaewae.

I tae atu a Taniwharau me Tūrangawaewae kia tātāwhai i te taitara Rīki o Waikato mō te reanga tekau mā rima te pakeke raro iho. He māma noa iho mā rātou te uru pakanga atu i runga anō i te mea kei te kāinga o te Kīngi rātou.

Hei tā Herangi-Searancke, “I tērā tau ko Taniwharau i puta te ihu whakarae ki a rātou i toa.”

“E tika rawa tātou i konei hei tautoko i te kaupapa ā tō mātou Kīngi, a Kīngi Tuheitia.” Nā Wairau.

He tino pakanga nō te wehengarua kei mua ko ngā ihu o Tūrangawaeawae.

Hei tā tē kāpene o Tūrangawaewae, hei tā Te Umuariki Heremia-Tukere, “Māro katoa a Taniwharau. Ia wā tākaro tātou i a rātou ko rātou tērā kei mua, kei muri.”

“He tino uaua ki te tākaro i a Turangawaewae. Ia kēmu ka patua mātou e tō rātou tino pai,” nā the kāpene o Taniwharau, nā Te Ohomauri Rapana.  

Ahakoa te pira a Taniwharau, hei te mutunga iho ko Tūrangawaewae tērā i toa e rua tekau ki te ono ngā tatau kia riro te taitara Rīki o Waikato mō te reanga tekau mā rima te pakeke raro iho.

“Ko te mihi noa iho ki tō tātou tīma. Mei kore ko rātou, ka kore tātou i eke,” nā Heremia-Tukere.

Ahakoa ngā tatau, ka tukia tonutia e ēnei kapa ānamata. Hei te mutunga o te rā, ko te kaupapa i toa.