Kaupapa: Rugby League

E tōmina ana te kapa Rīki Māori o NSW ki te kapo i te taitara toa

Tamati Tiananga
  • Tāmaki Makaurau
  • Ahitereiria

Ka pakanga te kapa Te Raki o NSW kia toa ai te wāhanga Rohe i te tauwhainga Rīki Māori ka tākarohia ki Tāmaki Makaurau ā ngā rā whakangā nei.  Ko Mark Horo tētahi i tākaro i tēnei tōnamana i ngā tau e rua tekau ma rima ki muri.  I tēnei tau, ka hoki ia hei kaiako i tēnei kapa nō Poihākena.   

Kua hoki mai te tautōhito Poumua Kiwi ō-mua a Mark Horo ki Aotearoa nei me tana kapa makau kaitākaro NRL e kī nei i te mahuri tōtara me te pito mata.

Kua ekea e Horo ngā karamatamata i ngā kapa o Parramatta me Wests, i mua i tōna taunga atu ki te kapa Warriors me āna tukinga tekau mā ono mō te kapa ā-motu.

Kuhu ai te kapa o Norths NSW ki te whakataetae o Ngā Hau e Whā, ā, ko te mea pōtiki o ngā tama a Horo, a Jayden, kei roto i te kapa.  Kua tohua anō ia ki te kapa rua tekau tau o Manley. 

He nui ngā mahuri me ngā pihipihi tōtara o te whakataetae NRL kei te kapa, ā, e ai ki a Horo ko te hoki mai ki te wā kāinga he kōingo matua mō rātou.

Ka uru atu rātou ki te wāhanga Tawhiao, arā te whakataetae mā ngā kapa ā-rohe, ā, ko te whakapae ka eke rātou ki te whiringa toa hei te Rātapu.