E takatū ana ētahi tauira Māori ki Hawai'i mō te Whakataetae Waka Ama Queen Liliuokalani Memorial

  • Tāmaki Makaurau

E takatū ana tētahi tokowaru Māori o te Whare Wānanga o Tāmaki ki tā rātau haerenga utu kore ki Hawai'i mō te Whakataetae Waka Ama Queen Liliuokalani Memorial.

He whakataetae tekau mā waru mairo te roa, koinei tētahi o ngā whakataetae waka ama roa rawa atu, uaua rawa atu o te ao.

Hei tā Tamoko Ormsby, “Ko te tino pūkenga me kī ko te ū ki te kaupapa, koira noa iho, kaha whakangungu ia wiki ia wiki.  Nā tērā te tūmanako ka ea te mahi.”

E takatū ana ēnei ākonga Māori o te Whare Wānanga o Tāmaki Makaurau ki te whakataetae Queen Liliuokalani Memorial Canoe Race, tētahi o ngā whakataetae waka ama roa rawa atu, uaua rawa atu anō hoki o te ao.

Ki tā Waimirirangi Koopu-Stone, “Kāore i te hīkaka rawa te wairua i tēnei wā, e mōhio ana mātau he maha o mātau mahi i mua i tō mātau wehenga, erangi te tūmanako hei tērā wā ka tino piki te wairua.”

I toa i te tira nei te whakataetae Great Waka Ama Race o te whare wānanga i te Poutūterangi.  I hoe rātau i Takapuna ki te Rangitoto katahi rātau i piki ki te tihi o te motu rā, i heke anō ki tō rātau waka kātahi rātau i hoe anō ki uta, nā tēnei kua whai haerenga utu kore rātau ki Hawai'i.

E ai ki a Koopu-Stone, “Wētahi o mātau i tō mātau tīma kua hoe i mua i tēnei rēhi, erangi kāore anō mātau kua uru ki tētahi rēhi kua hāngai hoki tētahi wāhanga oma, tino uaua tērā.”

Ā, i whākī mai tētahi o ngā mema, i nui te whakapau kaha, heoi he ringa āwhina anō i a Tangaroa.

Hei tā Noenoe Barclay-Kerr, “I te tūnga tuatoru tō mātau tīma katahi i tahuri ngā tīma o mua nā ngā ngaru o te moana, nā tērā i waimaria mātau.”

Ka rere atu rātau hei tērā Rāpare te tuatoru o Mahuru.  Ko tā rātau rēhi 29 kiromita te roa ka tīmata hei te Rāhoroi.