E rua ngā rekoata Aotearoa hōu tā Munro-Halkyard

Aroha Treacher

Kua riro i te toka tū moana i a Puawai Munro-Halkyard ngā rekoata e rua mō te hiki maitai ki Aotearoa nei. He iwa tekau mā ono kirokaramu te taumaha mō tana hikirua, nā kona ka riro ki a ia te taitara toa mō te wāhanga mā ngā wāhine ono tekau mā toru te taumaha ki te whakataetae hiki maitai o Aotearoa.

He huarahi uaua mā Puawai ki te ngahoro i aia he rua kirokaramu i te rā kōtahi kia taea ai e ia te whai wāhi atu ki te wāhanga ono tekau mā toru i tēnei whakataetae.

I whati a ia i te rekoata o mua, he iwa tekau mā tahi kirokaramu mō te 'Clean & Jerk' i riro i a Lauren Roberts i ngā taumāhekeheke hoa whenua i tēnei tau, i hikina te iwa tekau mā rua i tana hiki tuatahi, engari i tana hiki tuarua i hikina te ono tekau mā ono kirokaramu.

Kua eke a Puawai hei matakikoha wahine o te ao CrossFit nō konei, ā, he mea ngāwari noa māna ki te mahi i ngā hākinakina e rua, arā te CrossFit me te hiki maitai.

I whiwhi a ia i te taitara toa, he kotahi rau whitu tekau mā whā kirokaramu te taumaha, he kotahi kirokaramu ake i te rekoata o mua.  Ka mutu, ko te whāinga matua mō te wahine nei, he rua tekau mā whitu tau te pakeke, kia whai wāhi atu ki ngā taumāhekeheke hoa whenua kei te heke mai nei.