E rite ana Ngā Mamaku Takiwhitu mō te tau hou

James Perry, Tamati Tiananga

Kua ora anō, kua aro anō te kapa Mamaku Takiwhitu.

Whai muri i tō rātou wikitōria i te Ipu o te Ao i San Francisco i te Hōngongoi i whai hararei 6 wiki te roa te kapa, a e whā wiki ki muri hoki anō rātou ki te papa whakangungu. Hei tā te whetū o te kapa, hei tā Portia Woodman, kāore anō te tinana kia tino waia ki ngā āhuatanga tākaro, heoi e kipakipa tonu ana te manawa.

Kua tōpū te kapa ki tō rātou kainga, ki Tauranga Moana, ki reira whakangungu mō te hemo tonu atu i mua i tō rātou whakataetae tuatahi hei tērā wiki. Hei tā Ruby Tui, e wepua kinotia ana rātou e ngā kaiako, a me pērā ka tika i te timatanga o te tau. E rikarika ana ia mō te whakataetae ki Colorado.

E ono katoa ngā whakataetae o te Women's Rugby Sevens Series i tēnei tau. Ka tae atu te kaupapa ki Glendale, Colorado mō te wā tuatahi.

Atu i te Ipu o te Ao, i riro i Ngā Mamaku i te mētara kōura i te Taumāhekeheke Hoawhenua ki te Tai Kōura i te Paenga Whāwhā. Kāore te kaiako a Allan Bunting mō te noho ki te hāneaneatanga o wikitōria ō mua. Hei tāna, ahakoa te kounga o te tākaro i tērā tau, e noho ana ngā kapa katoa ki te taumata kōtahi i tēnei wā, nā reira me kaupare ngā whakaaro kiriora ki rahaki.

He mea whakaae e Tui, me rite ka tika tōna kapa. Hei tērā wiki kite ai mēnā kua rite rātou.

Nā Ahitereiria te whakataetae Sevens Series, 2018 i toa mā ngā kaute e rua noa iho.

Ka mutu te whakataetae i Glendale, ka hūnuku ki Dubai hei te Whiringa a Rangi, ka tū anō ētahi ki Poihākena, ki Hapāni, ki Kānata, ki Wīwī anō hoki. Hei tāpiri atu, ka tū ngā whakataetae nei hei whiringa whakauru ki ngā Taumāhekeheke o te Ao ki Tokyo, Hapāni, 2020.