Kaupapa: Netball

E ono wikitoria karapīpiti ki te kapa Pulse

Ruth Smith
  • Tāmaki Makaurau

Nāwai i wawata kia hua nui, kātahi ka hua kore te kapa Mystics, i tā rātau tukinga tuatahi ki te kapa Pulse mō tēnei whatinga.  Ko te manawa kairoke tērā o te kapa Pulse i kitea me te aha e whānui ana te hou o ō rātau rongo.  Toa ai te kapa Pulse, e 60 ki te 38.

E ono karapīpiti ngā kēmu kua toa te kapa Pulse, ā, ko ngā kaitītere rangatahi anō ērā i wepuwepu i ngā kaikaupare tautōhito o te motu, ko Anna Harrison rātau ko Mikaela Sokolich-Beatson, ko Phoenix Karaka.  Ā, nā whai anō e noho nei rāua ki te kapa matua.

Ehara i te mea ko te wāhi ki ngā kaituki anake i eke, engari kē ia, ko ngā kaikaupare, ko Katrina Grant rāua ko Sulu Fitzpatrick ēra i roromi i te kaha o ngā kaitītere o te kapa Mystics.

E ai ki te rōpū whakahaere o te kapa, kāre e whāiti ana te kaha ki tētahi wāhi kotahi, engari kē ia e whānui ana kia horapa ki te nui o te kōti.

Kāre e kore e whai ana te kapa Mystics kia rānaki i tēnei mate i te tukinga tuarua ki te tīma toa ka tū hai te Pōtapu e tū mai nei, ki Ōtautahi.