E mau tonu a Counties-Manukau i te Hīra Ranfurly

Rahia Timutimu
  • Tāmaki Makaurau

E uruhau tonu ana te kapa o Manukau-Whānui, i parea e rātou te wero o Waikato mō te Hīra Ranfurly i tērā wiki me te mōhio ka kore te rākau tipua e whakataetaehia i tēnei wiki.

Kua huri te aro ki te tukinga ki ngā Puia o Te Waiariki i Rotorua ā te Rātapu.  Ā, hei tā Hikawera Elliot, ka pakanga ururoa tā rātou hoariri i tēnei wiki, kia noho tonu ki te reanga matua o te whakataetae Ipu ITM.

Harikoa ana ngā kanohi o ngā kaitākaro i waenga i te kapa o Tāmaki ki te Tonga, ā, ka tika me pērā ai.

Kua whakangungu rātou i te hīra Ranfurly e rua ngā wā, ā, kotahi te tukinga kei te toe kia tae ki te wā ka noho tonu te hīra ki waenga i te kapa mō te tau.

Heoi ko te anga ināianei ki te kapa o Te Waiariki, ka rere rātou ki Rotorua i te Rāhoroi mō te tukinga i te Rātapu.  Ahakoa kei raro rawa a Waiariki i te tēpu whakataetae, e mōhio ana a Tāmaki ki te Tonga, he pakanga kei te haere.

Kei te tūranga tuawhā a Tāmaki ki te Tonga i tēnei wā, e toru ngā tukinga kei te toe i mua i ngā whiringa.

E mōhio ana rātou, ki te hiahia āwhina hei hiki i te kapa, me titiro noa iho ki te taha kia eke ki te taumata hiranga.