E hoki ana ā Flavell ki Āmerika

James Perry

Kua riro karahipi poitūkohu anō a Matangiroa Flavell ki Āmerika. E rua tau tāna noho ki Midland I Texas, hei ngā wiki tata nei whitirere atu anō ia ki Texas, kuraina ai.

Kua whai wāhi atu a Flavell ki te kura o Houston Baptist University, ki Āmerika. He kura e noho nei ki te Division 1 i te poitukohu. E ai kia Flavell, koirā te taumata teitei i Āmerika. "Ko te āhuatanga ka piki ake mā te Div three, div two, div one. Ana ko te div 1 te teiteitanga o ngā taumata katoa."

Ēhara i te mea ko te poitūkohu noa iho tāna e whai nei i HBU. Ko tāna anō, he kura iti, he kura tūmataiti anō hoki, ka mutu "kei reira hoki ētahi o ngā rauemi e hiahia ana au kia whai i tōku ara mō te matauranga. 

Kua rua tau te ākonga mātai koiora e noho tawhiti ana i tōna whanau i Amerika, ā mā tēnei karahipi ka rua tau anō tāna noho ki Āmerika. "He āhuatanga tino uaua, ēhara i te mahi ngāwari. Ia ra, ia ra ka waea au ki nga pepi, ki nga tuakana, ki ngā tungane ki ngā mātua."

Ko tētahi o ngā tuakana e kōrero nei ko Mīria. Hei tāna, "Ka noho mokemoke mātou, i ngā wā katoa. He mahi uaua, engari ko te mea nui kia mātou kei te whai ia i ōna moemoea, i ōna wawata."

Ko te noho ki te whānau te mea nui i tēnei wā, ka mutu e kimi mahi ana a Flavell mō ngā wiki nei. Hei te Here-turi-kōka wehe atu ai a Flavell ki HBU.