Kaupapa: Netball

E hikahika ana te ahi o te whakataetae ANZ

Ruth Smith
  • Tāmaki Makaurau

Kapi kau ana ngā kēmu o te Rātapu, ko te kapa Steel tērā i puta i te pō kerekere, he raru nō ngā rama o te whare, ki te ao mārama.  Hinga ai i a rātau te kapa Magic - e 75-58.

Ko taua āhuatanga anō rā, ko te kaha tērā i whakakitea e te kapa toa o te tau kua hori, e te kapa Steel, e noho nei ināianei ki te tūranga tuarua ki te tēpu whakataetae.  Pakanga ai rātau mō te hemo tonu atu i te taha tukituki, ā, ko te whakaea anō i ngā haukotinga hai piro i te roanga o te kēmu i kitea ai te pakari o te kapa nei me te take e ahu tōtika ana rātau ki te rauna whiringa whāiti. 

Heoi anō, ko te tauaro kē i kitea i te kapa kaingākau o te whakataetae, i te kapa Pulse, i hinga i te kapa e noho ana ki te tūranga tuatoru o te whakataetae, i te kapa Tactix.

E kainamu mai ana ngā whiringa whāiti, ā, ko te kapa Tactix tērā e whakaū ana i te whakapae ko rātau ka tae.  Kitea ai te tautōhitotanga o te takirua tukituki, o Temalisi Fakahokotau rāua ko Jane Watson e whakawehi ana i ngā kaitītere o te kapa Pulse, e whakawana ana hoki i tō rāua ake kapa kia puta ai ko ō rātau ihu.  Kuhu mai ana ko Ameliaranne Ekenasio i te wāhanga tuarua hai tānga manawa mō tōna kapa, heoi, auare ake i te mutunga iho, ko te kaha mārika o ngā kaitukituki o kapa Tactix i noho ai ko rātau kai runga.

Toa ai te kapa Tactix e 44-39, ā, e aro ana te kapa Pulse ināianei ki te tukinga ki te kapa Northern Mystic ka tū hai tēnei pō ki te whare o Pulman Arena.